Búgin Mańǵystaý oblysynyń ákimi Eraly Toǵjanov Sıngapýrdan kelgen álemge belgili «Meınhard» kompanııasynyń ókilderimen kezdesip, óńirdiń damýyna sep bolar áriptestikke qoldaý bildirdi.
«Meınhard» - álemniń alpaýyt memleketterinde qanatyn keńge jaıyp, ekonomıka, áleýmet, mádenıet, sport, bilim salalaryna ekpindi úles qosyp, dúnıeniń túkpir-túkpirinde záýlim ǵımarattar salǵan, iri jobalarǵa dem bergen ınjınırıngtik kompanııa. Búkil álemde kompanııanyń 45 keńsesi men 4500 qyzmetkeri jumys isteıdi. Erteńgi kúnge senimmen kóz tigip, órkendeý jolyna nyqtap túsken Qazaqstan eliniń áleýetine qyzyǵýshylyq bildirgen olar endi bizdiń elde 46-shy keńsesin ashqysy keledi.
Bul nıetin «Meınhard» kompanııasynyń basqarma tóraǵasy Shahzad Nasım aımaq basshysyna jetkizip, kásiporynnyń tarıhymen, damýy jáne múmkindikterimen tanystyryp, júzege asyrǵan jobalary – Sıngapýr, London, Indııa, Afrıka jáne taǵy basqa álem memleketteriniń sánine aınalǵan eń bıik ǵımarattar, áýejaılar, meımanhana men saýda oryndar keshenderi, eskertkishter, kópirler, nysandardy prezentasııa arqyly kórsetti.
- Mańǵystaý - Qazaqstannyń áleýmettik-ekonomıkalyq damýy men modernızasııasyna eleýli úles qosyp otyrǵan óńirlerdiń biri. Kómirsýtek shıkizatynyń jáne basqa da paıdaly qazbalardyń úlken qory aımaqtyń damýyna uzaq merzimdi perspektıvalar beredi. Teńizdiń bolýy jáne bizdiń aımaqtyń baı mádenı, tarıhı jáne rýhanı muralary týrızmdi damytýǵa jáne halyqaralyq saýdany damytýǵa múmkindik beredi, - dedi oblys ákimi E. Toǵjanov kezdesýde.
-Bizdiń kompanııa Qazaqstanda 2 jobany júzege asyrdy. Olar «Abý-Dabı Plaza» jáne «Han-Shatyr» saýda-oıyn-saýyq ortalyǵynyń dızaıny. Kompanııa medısına, Qorǵanys mınıstrligi jáne sport ǵımarattary jáne «aqyldy qala» júıesi boıynsha jobalardy ázirleýde, - dedi Shahzad Nasım.
О́ńirbasshysy kompanııa ókilderine týrızmdi damytý jobalaryn júzege asyrýǵa, sondaı-aq munaı-gaz salasy men IT-tehnologııalar salasyndaǵy kadrlar daıarlaýǵa arnalǵan oqý ortalyǵyn ashýǵa shaqyrdy. Kezdesý sońynda álemniń eń bıik, záýlim ǵımarattaryn salǵan sıngapýrlyq kompanııa ókilderine birlesip jumys isteýge daıyn ekendigin aıtyp, qalanyń ekonomıkalyq-áleýmettik damýyna úles qosatynyna senim bildirdi.
Gúlaıym ShYNTEMIRQYZY, «Egemen Qazaqstan» Mańǵystaý oblysy